Lúkas

Krossfestur.

Þegar þeir leiddu hann út, tóku þeir Símon nokkurn frá Kýrene, er kom utan úr sveit, og lögðu krossinn á hann, að hann bæri hann eftir Jesú. En honum fylgdi mikill fjöldi fólks og kvenna, er hörmuðu hann og grétu. Jesús sneri sér að þeim og mælti: ,,Jerúsalemsdætur, grátið ekki yfir mér, en grátið yfir sjálfum yður og börnum yðar. Því þeir dagar koma, er menn munu segja: Sælar eru óbyrjur og þau móðurlíf, er aldrei fæddu, og þau brjóst, sem engan nærðu. ( Þá munu menn segja við fjöllin: Hrynjið yfir oss! og við hálsana: Hyljið oss! ) Því að sé þetta gjört við hið græna tréð, hvað mun þá verða um hið visna?"  Með honum voru og færðir til lífláts aðrir tveir, sem voru illvirkjar. Og er þeir komu til þess staðar, sem heiitir Hauskúpa, krossfestu þeir hann þar og illvirkjana, annan til hægri handar, hinn til vinstri, Þá sagði Jesús: ,,Faðir, fyrirgef þeim, því að þeir vita ekki, hvað þeir gjöra. En þeir köstuðu hlutum um klæði hans og skiptu með sér. Fólkið stóð og horfði á, og höfðingjarnir gjörðu gys að honum og sögðu: ,,Öðrum bjargaði hann, bjargi hann nú sjálfum sér, ef hann er Kristur Guðs, hinn útvaldi." Eins hæddu hann hermennirnir, komu og báru honum edik og sögðu: Ef þú ert konungur Gyðinga, þá bjargaðu sjálfum þér." YFIRSKRIFT var yfir honum: ÞESSI ER KONUNGUR GYÐINGA. Annar þeirra illvirkja, sem upp voru festir, hæddi hann og sagði: ,,Ert þú ekki Kristur? Bjargaðu sjálfum þér og okkur!" En hinn ávítaði hann og sagði: ,, Hræðist þú ekki einu sinni Guð, og ert þó undir sama dómi? Við erum það með réttu og fáum makleg gjöld fyrir gjörðir okkar, en þessi hefur ekkert illt aðhafst." Þá sagði hann: ,, Jesús minnst þú mín, þegar þú kemur í ríki þitt!" Og Jesús sagði við hann:  Sannlega segi ég þér: Í dag skaltu vera með mér í Paradís."

        (Lúkas,23:26-43.) 

Athugasemdir

[Guðrún Sæmundsdóttir, 21.3.2008 kl. 14:27]

Það er ómögulegt að gera sér í hugalund allar þær kvalir mannana sem að Jesú leið saklaus til að leysa okkur. Ekki einungis þurfti hann að ganga í gegnum gríðarlega líkamlegar kvalir heldur bókstaflega allar andlegar og tilfinningalegar misþyrmingar sem að hægt er að hugsa sér allt til þess við mættum fá lausn fyrir hann. Dýrð sé Guði